"Ош" курама КВН командасы Астанада өткөн оюнда ийгиликке жетти

"Ош" курама КВН командасы Астанадан олжолуу кайтты. Бул тууралуу команданын мүчөсү Калыбек Турдубаев SUPER.KG порталына билдирди.

Маалыматка ылайык, 24-январда Астанада "КТА" (Көңүлдү тапкычтар ааламы) оюнунун Жогорку Лигасынын 3-сезону старт алган. Анда “Универсал”, “Ошингтон”, “No name” командаларынын оюнчулары - Кадыр Жарматов, Садык Нишанбай уулу, Актилек Акыл уулу, Алмаз Муктар уулу “Ош” курама командасы катары катышып, байгелүү кайтышты.

Жалпысынан оюнга 25 команда катышып, 14 команда кийинки оюнга жолдомо алышкан.

"Командалардын ичинен эң мыкты оюн көргөзгөндүгүбүз үчүн эң алдыңкылардан болуп жолдомо алдык. Оюн учурунда кыйынчылыктар болбой койгон жок, анткени көрүүчүлөр кыргыз тилин жакшы түшүнө албай жатышты", - деп билдирди Турдубаев.

Ошондой эле команда мүчөсү оюнга Ерке Есмахан, “Спарта” командасынын капитаны Данияр Жумадилов сыяктуу белгилүү адамдар калыстык кылганын кошумчалады.

Мындан сырткары, команда акчалай сыйлык үчүн гана эмес, кыргыз элинин атын чет жерде чыгаруу үчүн оюнга катышып жаткандыгын айтып өттү.