“Кызды силерге калтырдым, бактылуу болсун! Кызым үчүн кайра келбейм, салмагы 2,5 килограмм” деп кат жазып, ымыркайын таштап кеткен эне изделүүдө

5-июнда саат 21:00 чамасында Ысык-Көл облусундагы Балыкчы шаарында белгисиз жаран жаңы төрөлгөн ымыркайын бирөөнүн эшигинин алдына таштап кеткен. Бул тууралуу ИИМдин басма сөз кызматы билдирди. Кечинде 50 жаштагы үй ээси жубайы менен эшикке чыгып, оролгон ымыркайды көрүшкөн. Таштанды кыздын жанында баштыкка салынган кийими жана “Кызды силерге калтырдым, бактылуу болсун! Кызым үчүн кайра келбейм, салмагы 2,5 килограмм” деген кат болгон. Таштанды кызды медицина кызматкерлери текшеришип, ден соолугу жакшы экени белгилүү болгон. Маалыматка ылайык, кыздын төрөлгөнүнө 10 күндөй болгон. Учурда баласын таштап кеткен эне изделүүдө.