"Despacito" ыры "Грэмминин" бир да сыйлыгын алган жок

2017-жылы дүйнөгө хит болгон "Despacito" ыры "Грэмми" сыйлыгын ала алган жок. Көпчүлүк музыка сүйүүчүлөр жана музыка сынчылар социалдык тармактарга бул тууралуу нааразы пикирлерин жазышып, талкуулап жатышат.

Испан тилинде аткарылган "Despacito" ыры бир дагы номинацияда "Грэмми" сыйлыгына татыбай калганы - бул калыстык эмес. Мындай макалалар "Forbes" журналы баш болгон көптөгөн белгилүү басылмаларда да жазылууда.

2017-жылы пуэрто-риколук Луис Фонси жана Дэдди Янкинин ыры 16 жума "Billboard Hot 100" хит-парадында биринчи саптан түшкөн эмес. Аталган ырга тартылган клип 4 миллиарддан ашык жолу көрүлүп YouTube видеохостингинин тарыхында эң көп кароо жараткан клипке айланган.

"Despacito" ыры "Грэмми" сыйлыгына "Дуэттин же топтун эң мыкты аткаруусу", "Эң мыкты ыр", "Эң мыкты үн жаздыруу" номинацияларында ат салышкан.

Көпчүлүк интернет колдонуучулар "Грэмми" сыйлыгынын уюштуруучулары акчага сатылып кеткенин жазып чыгып, жыйынтыктарга канааттанбаганын билдиришкен. Ал эми айрым колдонуучулар аталган ыр 2017-жылы бардык жерде жаңырып, элди тажатып жибергендигин билдиришкен.

Эскерте кетсек, "Грэмми" сыйлыгынын 60-сыйлык тапшыруу аземинде америкалык ырчы Бруно Марс 7 "Грэмми" сыйлыгына ээ болгон.