Бишкек ЖЭБдеги авария боюнча козголгон кылмыш ишин тергөө УКМКнын башкы тергөө башкармалыгына жүктөлдү

Бишкек жылуулук электр борборундагы авария боюнча козголгон кылмыш ишин тергөө Улуттук коопсуздук комитетинин башкы тергөө башкармалыгына тапшырылды. Бул тууралуу бүгүн, 2-февралда аталган комитеттин басма сөз кызматынан билдиришти.

"Бишкек ЖЭБдеги авария боюнча козголгон кылмыш ишин иликтөө 1-февралда Башкы прокуратура тарабынан УКМКнын Башкы тергөө башкармалыгына тапшырылды. Учурда тергөө иштери жүргүзүлүп жатат", - дешти мекемеден.

Буга чейин 30-январда Башкы прокуратура ЖЭБдеги авария боюнча "шалаакылык" беренеси менен кылмыш ишин козгогон.

Айта кетсек, 26-январда кечки саат 6 чамасында Бишкектеги Жылуулук электр борборунун модернизацияланбаган бөлүгүндөгү от казандарда маселе жаралып, суунун температурасы 84 градустан 62 градуска чейин төмөндөгөн. Буга байланыштуу шаардагы үйлөргө берилген жылуулук төмөндөгөн.

Мындан улам 2 күн аралыгында Бишкекте электр энергиясын пайдалануу 8-10 пайызга жогорулаган. Электр жабдыктарына күч келгендиктен Бишкектеги кичи райондордо жайгашкан айрым көп кабаттуу үйлөр жарыксыз калган.

Бишкек ЖЭБден 120 миң 947 үй жылуулук менен камсыздалат.