Кочкор-Ата шаарындагы үйлөрдүн биринен 3 адамдын жансыз денеси табылды. Алардын каза болгонун 2 күн эч ким билген эмес

Жалал-Абад облусундагы Кочкор-Ата шаарында 3 адам мештен чыккан иске ууланып каза болду. Маалыматты окуянын күбөсү SUPER.KG порталынын "Элдик кабар" рубрикасына WhatsApp аркылуу кабарлады.

Окурмандын айтымында, алардын жансыз денеси 2 күн үйдүн ичинде жаткан.

"Үйдүн кожоюнунун баласы Майлуу-Суу шаарынан ата-энесин көргөнү келгенде эшиги бек болуп, эч ким ачкан эмес. Ал күнү ал кайра Майлуу-Сууга кеткен. Эртеси кайра келип, эшиктин ошол калыпта бек турганын көргөн. Дароо милицияга кабар берип, үйгө киришип ичинен 3 адамдын жансыз денесин табышкан", - деп жазган окурман.

Маалыматты Жалал-Абад облустук ички иштер башкармалыгынын маалымат кызматы тастыктап, каза болгондор үй ээлери экенин билдирди.

"4-февраль күнү Кочкор-Ата шаарындагы үйлөрдүн биринен 1953-жылы туулган эркек киши, 1960-жылы туулган анын жубайы жана Ноокен районунун Момбеков айыл аймагынын 1966-жылы туулган жаранынын жансыз денелери табылды. Алар мештен чыккан иске ууланып каза болгон. Окуя болгон жерде кароолор жүргүзүлүп, каза болгондордун жансыз денелери Кочкор-Ата шаарындагы өлүкканага жеткирилген. Бул факты боюнча тиешелүү экспертизалар дайындалып, текшерүү иштери жүргүзүлгөн”, - деди Жалал Абад ОИИБинин маалымат катчысы.