"Аида Саляновага карата адилетсиз, саясий өңүттөгү сот өкүмү чыкты" дейт депутат Никитенко

Бүгүн, 7-февралда Бишкек шаардык сотунда депутат Аида Салянованын иши каралып, сот өкүмү чыкты. Ага ылайык, Ленин райондук сотунун өкүмү өзгөртүүсүз калтырылды.

Аталган отурумга катышкан Жогорку Кеңештин “Ата Мекен” фракциясынан депутат Наталья Никитенко Аида Саляновага карата саясий өңүттөгү адилетсиз өкүм чыкканын айтты.

"Аида Саляновага карата адилетсиз, саясий өңүттөгү сот өкүмү чыкты. Ага бүткүл өлкөнүн жарандары күбө болду. Аида Салянованын шаардык сотто каралган ишинде аябай көп мыйзам бузуулар орун алды. Райондук сотто каралгандагыдан да көп мыйзам бузуулар болду. Бүгүн мына тамтыгы кеткен сот тармагынын чыныгы жүзү көрүндү. Бул тармакта реформа жүргүзүп, адилеттүү сотторду тандап алуу зарыл", - деди депутат.

Эскерте кетсек, Салянова "Юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталып, 2017-жылдын 10-октябрында Ленин райондук соту тарабынан күчөтүлгөн тартипте 5 жылга эркинен ажыратылган. Сот өкүмү анын 2 жаштагы наристеси 14 жашка толгондо күчүнө кирет.