Ошто баласын депкир менен эсинен тангыча сабаган келинге "адам өлтүрүү" беренеси менен кылмыш иши козголду

Ошто энеси тарабынан депкир менен сабалып, 10 күн комада жатып, эсине келбей чарчап калган 2 жаш 8 айлык баланын энесине Ош ШИИБи тарабынан Кылмыш-жаза кодексинин 97-беренеси (адам өлтүрүү) менен кылмыш иши козголду. Бул тууралуу SUPER.KG порталына Ош ШИИБинин маалымат катчысы Замир Сыдыков билдирди.

"Учурда шектүүгө "адам өлтүрүү" беренеси боюнча кылмыш иши козголду. Шектүү келин бир-эки күндүн ичинде Жалал-Абад облусундагы аялдардын тергөө абагына которулат. Тергөө иштери ошол жерде улантылат. Буга чейин баланын энесине Кыргыз Республикасынын Кылмыш-жаза кодексинин 234-беренеси (бейбаштык) менен кылмыш иши козголгон", - деди басма сөз кызматынан.

Эске салсак, Кара-Кулжа районунун 23 жаштагы тургуну өзүнүн 2 жаш 8 айлык баласын депкир менен эсинен тангыча сабагандыгы маалымдалган. Кийинчерээк өздүк булактар анын сойкулук менен алектениши мүмкүн экендигин билдиришкен. Ал эми дарыгерлер эсин жоготуп ооруканага түшкөн наристенин абалы оор экенин, анын денесинде ур-токмоктон калган эски тактар да бар болгонун айтышкан. Бул факты боюнча Ош шаардык ички иштер башкармалыгы тарабынан кылмыш иши козголуп, тергөөнүн жүрүшүндө аял баласын шымына сийип койгондугу үчүн сабаганын айткан. Кийин келиндин туугандары табылып, бирок аны менен байланышуудан баш тартып жатышканын Ош шаардык социалдык коргоо башкармалыгынан билдиришкен. Кийин келиндин ата-энеси табылып, бирок кызы менен байланышуудан баш тартышканы белгилүү болгон.