Америкалык актриса Линдси Лохандын Мода жумалыгына жоолук салынып келгени кызуу талкуу жаратты

Америкалык ырчы, актриса жана модель Линдси Лохандын ислам динин кабыл алгандыгы тууралуу кептер буга чейин эле айтылып келсе, жакында эле анын Лондондо өткөн Мода жумалыгына жоолук салынып келгени бул сөздөрдү ого бетер курчутканын чет элдик басылмалар жазып чыгышты.

Маалым болгондой, актриса көргөзмөгө кара түстөгү жоолук салынып келип, күйөрмандары менен сүрөткө түшүп, көп өтпөй эле кетип калган. Ошондой эле косметика чыгарган белгилүү компаниялардын бири өзүнүн каражаттарын колдонуп көрүү үчүн тартуу кылганда, ал дайыма адал гана боёктор менен боёно турганын айткан. Учурда бул көрүнүш интернет колдонуучулары тарабынан кызуу талкууга алынууда.

Белгилей кетсек, Лохандын ислам динин кабыл алгандыгы тууралуу кептер өткөн жылдан бери айтылып келет. Тактап айтканда, былтыр ал социалдык тармактагы баракчасынан бардык сүрөттөрүн өчүрүп, аты-жөнү жазылган жерге "Алейкум салам" деп жазып койгон. Бирок актрисанын апасы кызы жөн гана социалдык тармактан тажаганын айтып, бир аз убакытка тыныгууну чечкендигин билдирген. Ал эми актриса өзү бул тууралуу эч кандай билдирүү таратпастан, болгону Куран китебин окуп жаткандыгы тууралуу айткан.

"Лондондо мусулман досторум көп. Бир жолу алар Куран китебин окуп көрүү үчүн беришкен. Бул китепти Нью-Йоркко барганда да окуп жүрдүм. Ал мага көп эшиктердин каалгасын ачты", - деген ал.

Айта кетсек, Лохан буга чейин бир канча мусулман өлкөлөрүнө кайрымдуулук иштери менен барып, сириялык качкындарга жардам берип келген.