АКШда жакында жасалма эттен даярдалган азык-түлүктөр сатыкка чыгат

АКШда жакында жасалма эттен даярдалган азык-түлүктөр сатыкка чыгат. Бул тууралуу чет элдик басылмалар жазып чыгышты.

Маалым болгондой, америкалык "Just" компаниясы жасалма эттен азык-түлүктүн бир нече түрүн чыгаруу алдында турат. 2018-жылдын аягында аталган компания лабораторияда өстүрүлгөн эттен жасалган азык-түлүктөрдү чыгаруучу дүйнөдөгү эң алгачкы ишкана болуп аталмакчы.

"Саналуу айлардын ичинде биздин лабораторияда иштеп жаткан кызматкерлерибиз эттин даамын табигый эттикине окшоштуруу иштери менен алек болушат. Азырынча мындай эттерди иштеп чыгуу тууралуу маалыматтарды коомчулукка жарыялабай турууну туура көрдүк", - деп билдиришкен ишканадан.

Компания жасалма эттин жардамы менен колбаса, сосиска жана башка продукцияларды чыгарууну көздөшүүдө.

Жасалма эт - пайдалуу заттарга бай, адамга жана айлана-чөйрөгө эч кандай зыяны жок продукт катары белгилүү. Окумуштуулар жана жаныбарларды коргоочулар малдарды атайын эт кылуу максатында өстүрүү бул ырайымсыздык экендигин баса белгилеп, жасалма эттин сатыкта пайда болуусу көптөгөн маселелердин чечилишине себеп боло турганын айтышкан.