Базар-Коргондогу кандуу окуя. Бычакталган келин менен апасынын абалы оор (фото)

Базар-Коргон районунда бычактан жаракат алып, ооруканага жаткырылгандардын ичинен экөөнүн абалы оор. Бул тууралуу бүгүн, 22-февралда Базар-Коргон райондук ооруканасынын директорунун катчысы Розагүл Анарбаева билдирди.

"Учурда бычакталган жарандардын баарына операция жасалды. Ал эми келин менен анын апасынын абалы оор бойдон калууда. Себеби алар башынан катуу жаракат алышкан. Ал эми 6 жаштагы баланын абалы туруктуу", - деп билдирди Розагүл Анарбаева.

Бычактан жаракат алгандар 6 жаштагы М.М. (эркек бала), 40 жаштагы К.К. (эркек киши), 44 жаштагы М.У. (аял киши), 25 жаштагы Ж.кызы Г. жана 58 жаштагы Ч.Б. (эркек киши) аттуу Кызыл-Ай айылынын тургундары болгон.

Эскерте кетсек, окуя 21-февраль күнү саат 21:30 чамасында Сейдикум айыл аймагынын Кызыл-Ай айылында болгон. Анда үйгө мас абалда кирип келген 1984-жылы туулган Б.Т. мурдагы аялы 1993-жылы туулган Ж.кызы Г.ны жана анын ата-энесин, 6 жаштагы баласын бычактап, кийин жардамга келген эки кошунасына да бычак сайган. Андан соң кылмышкер из жашырып качып кетип, эртеси эртең менен кармалган.

Кырсыктын кесепетинен окуя болгон үйгө коңшу жашаган 1983-жылы туулган Б.Т. бычактан алган жаракатынан улам каза болгон. Ал эми 5 адам ооруканага жеткирилген.