Элмирбек Иманалиевдин "Ыр перия" поэзия кечесине келгендер филармониянын залына батпай калды (фото)

Кечени жаш акындар Иманалиевдин калемине таандык балалыкка арналган ырын көркөм окуу менен башташты. Андан соң акын эл алдына чыгып өзү ырларын биринин артынан бирин окуп элдин черин жазды.

Поэзия ырларын уккандан кийин кеченин коноктору андан комуз менен чыгармаларды аткарып берүүсүн өтүнүштү.

Күйөрмандардын өтүнүчүн четке какпастан Элмирбек Иманалиев өзүнүн "Булбулум" аттуу чыгармасын комуздун коштоосунда аткарды.

Поэзия кечесине келген белгилүү акындар, маданият өкүлдөрү жана акындын көптөгөн күйөрмандары залга батпай, кече бою туруп тургандардын саны көп болду.

Акынды колдоо үчүн келген Жогорку Кеңештин депутаты Садык Шер-Нияз өз сөзүндө акынга чыгармачылык эргүү каалап төмөнкүлөргө токтолду: "Элмирбек көп кырдуу талант. Эл ар бир талантын колдоп-коштоп турса ал тарбиялаган жаштар белгилүү акын болуп чыгарына ишенем".