Аргентинада ит ээсинин мүрзөсүндө 11 жыл жашап, анан өлдү

Аргентинада ит ээсинин мүрзөсүндө 11 жыл жашап, анан өлдү. Бул туурасында чет элдик маалымат каражаттары жазып чыгышты.

Белгилүү болгондой, Капитан атка ээ болгон немец овчаркасы өзүнүн маркум ээси Мигель Гузмандын мүрзөсүндө 11 жыл жашаган.

"Мигель каза болгон соң Капитан жоголуп кеткен. Бирок көп убакыт өтпөй аны мүрзөлөрдүн арасында жүргөнүн көрдүк", - деп Гузмандын жакындары билдирген.

Мүрзөлөр жайгашкан аймактын кароолчусунун айтымында, Капитан көп убакыт бою мүрзөлөрдү аралап жүрүп, бир күнү өзүнүн ээсинин мүрзөсүн таап алган.

"Капитан Мигелдин мүрзөсүн кантип таап алганы бизге дагы эле сыр бойдон. Ит 11 жыл аралыгында бир да жолу узак убакытка мүрзөдөн алыс кеткен эмес", - деген кароолчу.

Мындан төрт жыл мурун ветеринарлар ит ооруй турганын жана анын аз эле күндүк жашоосу калганын билдиришкен. Бирок буга карабастан ит дагы бир нече жыл жашаган.