Окуучуларга компьютердик программаны компьютерсиз үйрөткөн мугалим

Ганалык Овура Кванду аттуу мугалим колунда керектүү каражаты жок туруп, балдарга билим берип, окутуп келет. Бул тууралуу бир канча чет элдик басылмалар жазып чыгышкан.

Маалым болгондой, ал социалдык тармактагы баракчасына окуучуларга Microsoft Word компьютердик программасын тааныштырып жаткандыгын баяндаган сүрөт жүктөгөн. Анда мугалимдин аталган программаны балдарга компьютерсиз такта бетине чийип алып түшүндүрүп жаткандыгын көрүүгө болот.

"Ар бир мугалим билим берүүнүн ар кандай ыкмасын колдонот. А мен болсо бардык окуучулар сабакты түшүнмөйүнчө бир дагы окуучуну сыртка чыгарбайм", - деген ал.

Аталган билдирүү интернет колдонуучулардын кызуу талкуусун жараткан. Көпчүлүк адамдар мугалимдин окуучуларга билим берүүгө болгон умтулуусуна суктанып, макташса, айрым колдонуучулар ушундай өнүккөн заманда компьютери жок окуп жаткан балдарга боору ооруган. Ошондой эле бул жаңылык интернетке тараган соң көптөгөн белгилүү жылдыздар аталган мугалим иштеген жана башка мектептерге компьютер, прожектор жана башка керектүү техникаларды алып берүү максатында каражат чогултуп баштаганын жергиликтүү басылмалар маалымдашкан.