Түндүк Кореянын лидери Бразилиянын паспортун колдонгону маалым болду

"Түндүк Кореянын башчысы Ким Чен Ын жана анын атасы Ким Чен Ир 1990-жылдары алдоо жолу менен алынган Бразилиянын паспортторун колдонуп жүрүшкөн", - деп бүгүн, 28-февралда "Рейтер" маалымат агенттиги жазып чыкты.

Маалым болгондой, документтер Батыш өлкөлөрүнө виза ачуу үчүн берилген.

Түндүк Кореянын башчыларынын жасалма паспорттогу ысымдары Йозеф Пхак (туулган жылы, күнү - 1983-жыл 1-февраль) жана Ижонг Чой (1940-жыл 4-апрель) деп катталган. Ал эми туулган жери деген бөлүгүндө Бразилиянын Сан-Паулу шаары жазылган. Ошондой эле паспортто Прагадагы Бразилиянын элчилигинин 1996-жылдын 26-февралына карата штампы коюлган.

Бул жасалма паспорттор менен Бразилия, Япония жана Гонконг өлкөлөрүнө барууга уруксат берилерин чет элдик басылмалар жазып чыгышты. Азырынча жасалма паспорттор менен виза ачылганы тууралуу так маалыматтар жок.

"Ал эми Бразилиянын Тышкы иштер министрлиги паспорттун көчүрмөсүнүн негизинде териштирүү иштерин жүргүзүп жатат. Бразилия тарап бул документтер жасалма эместей көрүнгөнүн айтып, башка адамдарга жасалганы анык деп билдирүүдө.

Бразилиялык паспортторду өлкө лидерлери саякаттоо үчүн гана эмес, мамлекетте чукул кырдаал чыгып кала турган болсо өлкөдөн чыгып кетүү кызыкчылыгы үчүн алган", - деп айтылат маалыматта.

Мындан тышкары чет өлкөлүк басылмаларга таянсак, Түндүк Кореянын башчысы Ким Чен Ын бала чагында Токиого барган, ошондой эле ал Швейцариянын Берн шаарындагы эл аралык мектепте элчиликтин айдоочусунун уулумун деп билим алган.