Ошто айдоочу унаанын кол тормозун тартып коюуну унутуп кетип, машина короодо ойноп жаткан 2 жаштагы баласын тебелеп кетти

Ош шаарында токтоп турган унаа жылып кетип 2 жаштагы наристени тебелеп кетти. Бул тууралуу Ош ШИИБинин басма сөз кызматы билдирди.

Маалыматка караганда, 1-мартта саат 15:00 чамасында Ош шаарынын Тургунбаев кѳчѳсүнүн 27 жаштагы тургуну ѳзүнүн Мерседес-Бенц-270 үлгүсүндѳгү унаасын үйүнүн алдына нейтралдуу абалда токтотуп үйүнѳ кирип кеткен.

"Унаа артка карай жылып, ойноп отурган баласын тебелеп кеткен. Айдоочу ѳзүнүн уулу, 2016-жылы туулган наристени ооруканага алып барган учурда ички органдарынын катуу жабыркагандыгынан улам каза болуп калган. Ымыркайдын атасы жеке таксист. Ал ѳз кѳрсѳтмѳсүндѳ үйгѳ зарыл иштер менен келип, кайра эле кетүүнү ойлонгон, шашкандыктан унаасынын кол тормозун тартып коюуну унутуп калгандыгын айтып берген", - деп айтылат ШИИБдин маалыматында.

Учурда бул боюнча тиешелүү техникалык экспертизалар дайындалган. Окуя Ош шаардык ички иштер башкармалыгынын кылмыш каттоо китебине кокустук катары катталып, иликтѳѳ иштери улантылууда.