Жолдошбек Жанжигит уулу Жаштар театрынын жетекчиси болуп дайындалды

Бакен Кыдыкеева атындагы Кыргыз мамлекеттик жаш көрүүчүлөр театрына Жолдошбек Жанжигит уулу жетекчи болуп дайындалды. Бул маалыматты Маданият, маалымат жана туризм министрлиги билдирди.

Министрликтен: "Жолдошбек Жанжигит уулу 1 жылдык келишим менен жетекчилик кызматка дайындалды. Эгер алгылыктуу иштерди жасаса, келишимдин мөөнөтү узартылат", - деп билдиришкен.

Ал эми жаштар театрынын актёру Таалай Мамытов: "Бүгүн театрга "Учур" театрынын актёру Жолдошбек Жанжигит уулу жетекчи болуп дайындалды. Ал иш орду менен таанышкан соң, театрдын ишмердүүлүгү боюнча жакшы ойлорун айтты. Тажрыйбалуу жаштардын жетекчилик орунга келишине кубанып жатабыз", - деп билдирди.

Аталган театрды буга чейин Эгемберди Чалабаев башкарып келген.

Жолдошбек Жанжигит уулу 1980-жылы 12-майда Кемин районундагы Тегирменти айылында төрөлгөн. Ал жогорку окуу жайды аяктагандан кийин "Учур" театрында актёр, андан кийин көркөм жетекчи болуп эмгектенген. Ошондой эле Кыргыз-Түрк Манас университетинин искусство факультетинде окутуучу болуп иштейт.