Орусияда алып баруучу жана президенттикке талапкер Ксения Собчакка кол салуу болду

Бүгүн, 4-мартта орусиялык алып баруучу, келе жаткан президенттик шайлоого талапкерлигин койгон Ксения Собчакка кол салуу болду. Бул тууралуу ал социалдык тармактагы баракчасына жазып чыкты.

"Азыр эле Москванын чок ортосунда, Михаил Горбачёвдун туулган күнүнөн чыгып келе жаткан учурда мага кол салуу болду. Кудай жалгап, ал адам үстүмө суу эле чачты. Мен ал чачкан сууга тайгаланып жыгылып, башым менен бутумду кокустатып алдым. Ал Москванын шаардык Думасынын өкүлү Алексей Шапошниковдун жардамчысы экен. Азыркы учурда бийлик бандиттер менен кылмышкерлерге таянып алган. Оппозиция тарапка карата күч колдонуу кадимки көрүнүш болуп калган. Ал эми полиция кызматкерлерин дем алыш күндөрү чакырсаң 40 мүнөттө араң жетип келет. Ошондуктан эл саясатка аралашкысы келбейт. Бийликке каршы чыгуу - кооптуу, ал эми бийлик менен чогуу болуу - уят. Бирок биз коркпойбуз. Биз бул нерсени өзгөртөбүз. Шапошников сөзсүз түрдө кечирим сурап, андан соң жардамчысын жумуштан алат. Кол салуу аз нерседен башталат, эгер биз муну эмитен токтотпосок, кийин эч качан токтобойт", - деп жазган ал.

Ошондой эле суу чачкан адам "Бул Жириновский үчүн" деп айтканын кошумчалаган. Орус басылмаларынын жазгандарына таянсак, учурда ал адам колго түшүрүлүп, убактылуу кармоочу жайда сурак берип жатат.

Айта кетсек, буга чейин Собчак менен Жириновский дебат учурунда айтыша кетишкен. Жыйынтыгында ачууга алдырган Собчак ага суу чачып салганын орус жалпыга маалымдоо кызматтары жазып чыгышкан.