Кенияда дарыгерлер адашып башка бейтаптын баш мээсине операция жасап алышкан

Кенияда дарыгерлер адашып башка бейтаптын баш мээсине операция жасап алышкан. Бул тууралуу чет элдик маалымат каражаттары жазып чыгышты.

Белгилүү болгондой, дарыгерлер баш мээсинде кан уюп калган бейтаптын ордуна, башында шишиги менен келип операцияга муктаж эмес эле бейтаптын баш сөөгүн ачып бир нече саат операция жасашкан. Бейтаптын баш мээсинен тромб табылбаган соң гана дарыгерлер адашып калганын түшүнгөн.

Оорукананын жетекчилиги билдиргендей, жаңылыш баш сөөгү ачылган бейтаптын абалы азыркы тапта жакшы. Ал эми операцияга муктаж болгон бейтаптын абалы азыркы мезгилде жакшырып калганына байланыштуу ага операция жасоо муктаждыгы жок экенин дарыгерлер айтышкан.

Бул окуядан соң операция жасаган нейрохирургду, анестезиологду жана 2 медайымды убактылуу жумушунан четтетишкен. Бирок оорукананын жааматы мындай жаңылыштык адистердин жана палаталардын жетишсиздигинен улам келип чыкканын айтып, кесиптештерин жумуштан кетирбөөнү талап кылып чыгышкан.