Кытай бийлиги үй-бүлөдө 3-баланын төрөлүшүнө уруксат бериши мүмкүн

Кытай бийлиги үй-бүлөдө 3-баланын төрөлүшүнө уруксат бериши мүмкүн. Бул тууралуу чет элдик маалымат каражаттары жазып чыгышты.

Белгилүү болгондой, мурун Кытай өлкөсүндө бирден ашык балалуу болууга тыюу салынган. Бирок өлкөдөгү жаңы төрөлгөн балдардын саны азайып кеткендигине байланыштуу бул мыйзам 2015-жылы алынган.

Үй-бүлөдө 3-балага уруксат берүү сунушун Гуандун провинциясынын өкүлү, адвокат Чжу Леюй киргизген. Анын айтымында, 2ден ашык балалуу болууга тыюу салуу өлкөдөгү демографиялык саясаттын бузулушуна жана жаңы төрөлгөн балдардын санынын азайышына алып келүүдө.

Бул маселе жыл сайын март айында өтүүчү эл өкүлдөрүнүн Бүткүл кытайлык сессиясында каралат.

Кытайда 1970-жылдардын аягынан тартып бир баладан ашык балалуу болууга тыюу салган мыйзам иштеп келген. Бул ар кандай демографиялык жана гендердик маселелерге алып келген. Ошондой эле бул мыйзамдын иштеши ишке жарамдуу жарандардын санынын кыскарышын көрсөткөн.