Жогорку Сот "сурак учурунда шектүүнү кыйнаган" деп айыпталган 3 милиция кызматкерине чыккан өкүмдү күчүндө калтырды

Жогорку Сот "21 жаштагы адамды сабап, кылмышты моюнуна алууга мажбурлашкан" деп айыпталып жаткан үч милиция кызматкерине карата чыккан өкүмдү күчүндө калтырды. Бул тууралуу Жогорку Соттун басма сөз кызматынан билдиришти.

Буга чейин Таш-Көмүр ШИИБинин 3 кызматкери 2015-жылы 21 жаштагы Эсенбек Анарбек уулун уурулукка шектүү катары кармап кетип, башына желим баштык, противогаз кийгизип кыйнап, сабаган деп айыпталган. Кийин 2017-жылы декабрь айында Жалал-Абад облустук соту милиция кызматкерлерин күнөөлүү деп таап, үчөөсүн тең 8 жылдан эркинен ажыратып, сот залынан камакка алган. Жалал-Абад облустук сотунун өкүмүнө ылайык, милиция кызматкерлери Автандил Болотов, Элзар Ибраимов жана Шекербек Ажибеков 8 жылга эркинен ажыратылган. Алар жазаларын күчөтүлгөн тартиптеги абакта өтөөгө милдеттендирилген. Бирок алардын жактоочусу чечимге нааразы болуп Жогорку Сотко кайрылып, аларды актап берүүнү өтүнгөн болчу.