Социалдык кызматкер: "Сабалган 8 жаштагы кыздын күбөлүгүндө атасынын аты-жөнү көрсөтүлгөн эмес, учурда апасы изделүүдө"

Бишкек шаарында жакындары тарабынан аёосуз сабалган 8 жаштагы кыздын өз энеси учурда изделүүдө. Бул тууралуу SUPER.KG порталына 13-мартта Аламүдүн райондук Социалдык өнүктүрүү башкармалыгынын башчысынын орун басары Тилек Миңбаев билдирди.

Жетекчинин берген маалыматына ылайык, кыздын туулгандыгы тууралуу күбөлүгүндө атасынын аты-жөнү жазылган эмес.

"Сабалган 8 жаштагы кыздын апасы изделүүдө. Биздин маалыматыбыз боюнча анын биологиялык апасы Нарын облусунун Жумгал районунда каттоого турган экен. Ал жакка энеси тууралуу маалымат жиберилип, учурда ал изделип жатат. Эгер апасы негизсиз 2 баласын кароосуз таштап кеткен болсо ал эне укугунан ажыратылат. Сабалган кыздан сырткары 10 жаштагы эркек уулу бар экени аныкталды. Ал эми секелек кызды ур-токмокко алуу фактысы боюнча кылмыш иши козголуп, учурда тергөө иштери жүрүүдө. Өгөй апасы урганын учурда кыз гана айтып жатат. Эгер бул тергөөнүн жыйынтыгында далилденсе, өгөй апасы өзүнүн бир уул жана бир кызын багуу укугунан ажыратылат", - дейт жетекчи.

Жабыркаган кызга учурда Аламүдүн райондук үй-бүлө жана балдарды коргоо мекемесинин кызматкери кам көрүүдө.

"Атасынын туугандары ооруканадагы кызга келип "апам урду дебе, байкем урду деп айт" деп коркутуп жатышканынан оорукананын администрациясынан кызга расмий өкүлдөрдү гана киргизүүнү сурандык. Учурда кызга биздин кызматкер кам көрүүдө. Кыз ооруканадан чыгарылган соң ал жаш балдардын психологунун карамагына алынып, атайын жаш балдардын борборунда тергөө бүткүчө болуп турат", - деп кошумчалады Миңбаев.

Айта кетсек, буга чейин Бишкек шаарында 8 жаштагы кыз жакындары тарабынан аёосуз сабалганын окурман "ЭЛДИК КАБАРга" билдирген. Андан кийин кызды тааныгандардын бири ал отургуч менен сабалганын кошумчалап айтып берген. Кыз "Тез жардам" кызматы менен Бишкек шаарындагы №3-балдар ооруканасына жеткирилген жана ооруканада жалгыз жатканын билдиргенбиз. Учурда аталган факты боюнча кылмыш иш козголду.