Москвадагы "Лужники" стадиону дүйнөдөгү мыкты стадион деп аталды

Орусиянын Москва шаарында жайгашкан "Лужники" стадиону эл аралык стадиондор сынагында "Дүйнөнүн мыкты стадиону" сыйлыгына ээ болду. Бул тууралуу чет элдик басылмалар жазып чыгышты.

Маалыматка ылайык, сынактын калыстар тобу дүйнөдөгү мыкты архитекторлордон түзүлгөн. Алар бир нече багыттар боюнча баа коюшкан.

Сынактын жыйынтыгында, 1-орунду Орусиянын Москва шаарындагы "Лужники" стадиону ээлеген. 2-орунда Франциянын Париж шаарындагы "U Arena" стадиону жайгашса, 3-орунду АКШнын Атланта шаарындагы "Mercedes Benz Stadium" стадиону ээледи.

"Лужники" стадионунда футбол боюнча Дүйнө чемпиондугунун алгачкы жана финалдык беттештери орун алат.

Айта кетсек, 2018-жылы өтө турган футбол боюнча Дүйнө чемпиондугуна карата "Лужники" стадионунда реконструкциялоо иштери орун алып, иштер 2017-жылы май айында бүткөн.