Измирдеги мейманканадан чыккан өрттөн жабыркаган кыздын таежеси: "Ал ата-энесинин жалгыз кызы, элдин сойку деген сөзү үй-бүлөгө катуу тийди"

Түркиянын Измир шаарындагы "Алижан" мейманканасынан чыккан өрттөн жабыркаган кыздын таежеси Таттыгүл Маканбаева SUPER.KG порталына кайрылды. Маканбаеванын айтымында, кырсык учурунда видеого тартылып калган, өрттөн качып бийиктиктен боюн таштаган 2 кыздын бири анын сиңдиси.

Видеодо көрүнгөндөй, кыздар мейманкананын ичинен чыккан өрттөн качып балконго чыгышат. Бирок башка бөлмөлөргө өтүп кетүү мүмкүн эмес экенин байкап, кайра бөлмөгө киришкен. Ал жакта өрт күч алып кеткенин кыздардын кайра шашылыш чыкканынан билсе болот, бир саамга айлаларын таппай калган кыздардын бири -Беларустун жараны, ал башка бөлмөгө өтөм деп жатып, жерге кулаган. Андан кийин имаратты каптап бара жаткан өрттөн корккон Кыргыз кызы боюн таштап, унаанын үстүнө, андан жерге түшкөн.

"Ошондогу кара көйнөкчөн кыз менин сиңдим, ал Түркияга мындан 3 ай мурун кеткен. Ата-энесине агенттик аркылуу чет элге кетип жатам деп айткан экен. Буга чейин Кореяга барып иштеп келгендиктен, ата-энеси көп деле кабатырланбай жөнөтүшкөн. Азыр чет элге иштеп кеткен жаштар көп да.

М.Ж. ал жакта "сойку" болуп иштеген деген кептер айтылып кетти. Бул сөз анын ата-энесине катуу тийди. Ал үй-бүлөдө ата-энесинин жалгыз кызы, мындай жолго барууга эч муктаж эмес болчу. Ал ушул мейманкананы жыйнап, полун жууганга ишке кирген экен. Кырсыктан жарым саат мурун видеочалуу аркылуу апасы менен сүйлөшүп, жанындагы беларустук кызды да көрсөткөн экен. Ошондо уктаганы жатабыз дептир", - деди Макамбаева.

Ал белгилегендей, эртең, 15-мартта М.Ж.нын апасы Түркияга учат. Буга чейин алар кыздын Түркияда мыйзамсыз жүргөнүн тиешелүү тараптардан сурап аныкташкан. Бул арада Тышкы иштер министрлиги өрттөн жабыр тарткан кыздын абалы турукташып калганын билдирди.

Эске салсак, Измир шаарындагы “Алижан” мейманканасында өрт чыгып, 4 адам жаракат алган. Алардын арасында М.Ж. аттуу Кыргыз кызы бар экени да белгилүү болгон.