Бишкек ЖЭБдин мурдагы директору: "Чындыкты айтканым үчүн мени кызматтан кетиришти"

Бишкек ЖЭБдин мурдагы директору Нурлан Өмүркул уулу чындыкты айтканы үчүн кызматтан кеткенин айтты. Бул тууралуу ал бүгүн, 15-мартта маалымат жыйында билдирди.

"Жогорку Кеңеште ЖЭБдеги авария боюнча жыйын болуп, ошондо авариянын чыныгы себебин айтканымдан кийин эле мени кызматтан кетиришти. Мени ошол күнү саат 10:00дөр чамасында тийиштүү органдар тарабынан "жалган маалымат таратып, элди көтөрүлүшкө чыгарууга үндөгөн" деген негиз менен кармашкан. Ошол эле күнү кечинде кайра коё беришти. Мени кармаган күн жума болчу, дүйшөмбү күнү жумушка барсам киргизбей коюшту. Себебин сурасам “Электр станциялары” ишканасынын жетекчиси Узак Кыдырбаев жана "Улуттук энергетикалык холдинг" ишканасынын башчысы Айбек Калиевдин чечими менен жумуштан кеткенимди айтышты. Бирок мага ал чечимди көрсөтүшкөн жок. Кыдырбаев тарабынан "Нурлан Өмүркул уулу ишканага киргизилбесин" деген тапшырма берилиптир, ошол бойдон жумушка бара алган жокмун", - дейт ал.

Эске салсак, 26-январда кечки саат 6лар чамасында Бишкектеги Жылуулук электр борборунун модернизацияланбаган бөлүгүндөгү от казандарда маселе жаралып, суунун температурасы 84 градустан 62 градуска чейин түшүп кеткен. Буга байланыштуу шаардагы үйлөргө берилген жылуулук төмөндөгөн. Орун алган мүчүлүштүктөрдөн улам Бишкектин тургундары 7 күнгө (январь айынан 5 күнгө, ал эми февраль айында 2 күнгө) акча төлөшпөгөнүн "Улуттук энергетикалык холдинг" компаниясынын басма сөз кызматынан кабарлашкан. Ошондой эле Башкы прокуратура ЖЭБдеги авария боюнча "шалаакылык" беренеси боюнча кылмыш ишин козгоп, ЖЭБдин башчысы Нурлан Өмүркул уулу кызматынан кеткен.