Президент Аксы окуясында курман болгондорду эскерди

Сооронбай Жээнбеков Аксы окуясында курман болгондорду эскерди. Бул тууралуу бүгүн, 17-мартта президенттин басма сөз кызматы билдирди.

Маалыматка ылайык, мамлекет башчы Бишкек шаарынын "Ала-Тоо" аянтындагы 2002-жылы Аксы окуясында жана 2010-жылы Апрель окуясында эркиндик жана адилеттүүлүк үчүн курман болгондордун эстелигине гүл койду.

Айта кетсек, бүгүн Аксы окуясына 16 жыл болду. 2002-жылы камакка алынган Азимбек Бекназаровдун тарапташтары Кербен, Жаңы-Жол, Кара-Суу жана Сары-Челек кыштактарын байланыштырган жолду тосушкан. Бийлик менен митингчилер арасындагы тирешүүдөн 6 киши каза болуп, 80дей жаран жаракат алган.