ЖЫЛНААМА, 18-МАРТ: Улуттук статистика комитетинин төрагасы Акылбек Султанов 53 жашка толду

Жогорку билимдүү. 1990-жылы Жалал-Абад зооветтехникумун "техник-электр-механик" адистиги боюнча, 2009-жылы Ош технологиялык университетин “экономист” адистиги боюнча бүтүргөн.

Эмгек жолун 1984-жылы Кара-Суу районундагы Отуз-Адыр совхозунда айыл чарба машиналарынын слесары болуп иштөөдөн баштаган. 1984-1986-жылдары Советтик Армиянын катарында кызмат өтөгөн.

Андан соң 1987-жылдан тартып 1988-жылга чейин Кара-Суу мамлекеттик малды интенсивдүү бордоп семиртүү боюнча атайын чарбада улук жумушчу болуп иштеген.

1988-1993-жылдары – Кара-Суу районундагы "Катта-Талдык" кой чарбачылыгы жана мал чарбачылыгы боюнча тажрыйба станциясында жумушчу-спорт инструктору жана кассир;

1993-1996-жылдары – "Россия-Кыргызстан" биргелешкен ишканасында бухгалтер;

1996-2005-жылдары – "Мааткерим" фермердик ишканасында директордун орун басары;

2005-2009-жылдары – "Жаңы Доор" ЖЧК пахта тазалоо заводунун директору болуп эмгектенген.

Акылбек Султанов 2007-жылы Ош шаардык кеңешинин депутаттыгына шайланган.

2009-2010-жылдары – "Түштүк кыргыз цемент" ЖАКсынын ишин камсыз кылуу боюнча директор болгон.

2010-жылдын октябрында КСДПнын тизмеси боюнча V чакырылыштагы Жогорку Кеңештин депутаттыгына шайланган. Жогорку Кеңештин Мыйзамдуулук, укук тартиби жана кылмыштуулукка каршы күрөшүү боюнча комитетинин мүчөсү болгон.

2015-жылы парламенттин 6-чакырылышына шайлоонун жыйынтыгы боюнча КСДПнын тизмеси менен Жогорку Кеңешке өтүп, бирок бир нече апта өткөндө, тагыраак айтканда, декабрь айында өз каалоосу менен депутаттык мандатын тапшырган.

2016-жылы апрель айында Улуттук статистикалык комитетинин башчысы кызматына дайындалган.

Акылбек Султанов Кыргыз Республикасынын Өкмөтүнүн Ардак грамотасы (2009), ИИМдин Ардак грамотасы (2010), Жогорку Кеңештин Ардак грамотасы (2010) менен сыйланган.

18-марттын жылнаамасы.