WhatsApp'та Бишкектеги соода борборлоруна барбоого чакырган билдирүү тарап жатат

Социалдык тармактарда 31-мартта соода борборлоруна барбоого үгүттөгөн билдирүүлөр тарап жатат. Мындай сунуш Орусиянын Кемерово шаарындагы соода борбордо 64 адамдын өмүрүн алган өрттөн улам келип чыкканы белгилүү.

Билдирүүдө соода борборлордун ээлери өрттүн алдын алуу, өрт коопсуздугуна кандай көңүл бурула турганы тууралуу машыгууларды өткөрүүлөрү зарыл экендиги айтылууда. Ошондой эле анда борборго келгендерге имараттын ичиндеги эвакуация пландары түшүндүрүлүшү керектиги белгиленген.

Борбордогу бир катар соода борборлордо машыгуулар жүрүп жатканын кызматкерлери билдирди. Соода борборлордун биринде иштеген кызматкер: "Бизде айына бир жолу техникалык администратор окуу-машыгууларды өткөрүп турат. Кемероводогу өрт бизди да силкинтти. Өрт чыкканда пайдалануучу эшик, терезелер кайрадан кароодон өткөрүлдү. Андан сырткары өрттөн сактоочу бет каптарды да сатып алдык. Жакынкы күндөрү машыгуу өткөрүү пландалды. Анын датасы, убактысы азырынча белгисиз. Окутуу жүргүзүлгөн учурда кадимкидей эле өзгөчө кырдаал жаралган учурдагы үн белги берилет. Күзөт кызматындагылар, соода түйүнүндөгү сатуучулар кандай кадам кылышары көзөмөлгө алынат", - дейт ал.