“Кышкы соната” корей сериалы аркылуу таанылган актриса Чой Жи У турмушка чыкты

Корей сериалынын төрөсү болгон “Кышкы сонатадагы” Кан Жун Сандын сүйүктүүсү Ю Жин эсиңизде чыгар. Мына ошол каарманды ойногон актриса Чой Жи У турмушка чыкты.

Үйлөнүү той жалпыга маалымдоо каражаттарынан жашыруун өтүп, актрисанын күйөрмандарына жазган кайрылуусунан кийин гана анын турмушка чыккандыгы ачыкка чыкты. Күтүүсүз жаңылыкты билдирген Чой Жи У мындай кадамга баруусун жолдошунун атактуу адам эмес экендиги менен түшүндүргөн. Той 100гө жетпеген эки тараптын туугандары жана башка жакын адамдарынын катышуусунда өткөнү айтылды. Чой Жи У кайрылуусунда жазгандай, турмушка чыккандан кийин деле актрисалыгын улантат.

Маалымат үчүн: Чой Жи У 42 жашта. Биринчи жолу 1995-жылы “Согуш жана сүйүү” сериалына тартылган. Бирок баш айланткан атактуулукту ага 2002-жылы чыккан “Кышкы соната” алып келген. Ушул дорамадан кийин көп жылдар бою корей жылдыздарынын арасында эң көп гонорар алган атактуу болуп турган. Ошондой эле “Бейишке карай тепкич”, “Аэропорт”, “Азгырык”, “Кайрадан жыйырма жаштагыдай” сериалдары көрүүчүлөр тарабынан жакшы кабыл алынган.