Ырчы Cамара Каримова телесериалга тартылып жатат

Кыргыз Республикасынын Эмгек сиңирген артисти, көп кырдуу талант ээси Самара Каримова учурда кыргызча телесериалга тартылып жатат. Бул тууралуу ырчы SUPER.KG порталына өзү билдирди.

“Көпчүлүк билгендей, мен буга чейин ырчылыктан сырткары театрда да роль аткарам. Өзүмдүн кесибим актриса. Жакында эле “Илегилек” спектаклин Ош, Бишкек шаарларына коюп, Казакстанга чейин барып келдик. Ал эми чоң кинодо бул дебюттук ролум. Буга чейин деле киного тартылууга сунуштар түшкөн. Бирок балдарым кичинекей болгондуктан баш тарткам. Азыр балдарым бала бакчага барат. Улуу балам мектеп босогосун аттаганы жатат. Анын үстүнө жолдошум да каршы болгон жок. Акын Жыпара Исабаеванын “Адашкандар” романынын негизинде “Ак шоола” деген 30 сериялуу телесериал тартылып жатат. Сериалдын башкы каарманы Акшоола деген кабарчы кыздын ролун аткарып жатам", - дейт ал.

Аталган телесериалдын режиссёру Ырыс Окенова. Ошондой эле ырчы актёрдук курамда Кыргыз өлкөсүнө таанымал актёр, актрисалар бар экенин кошумчалады.