"Ала-Тоо" ресторанындагы массалык уулануу. Жабыркагандар куурулган тоок этинен ууланганы аныкталды

"Ала-Тоо" ресторанында тамакка ууланган коноктор куурулган тоок этинен ууланганы белгилүү болду. Мындай маалыматты мамлекеттик санитардык-эпидемиологиялык борбору билдирди.

"Лабораторияга алынган азык-түлүктөр иликтенип жана жабыркагандарды текшергенде алардын организминен сальмонелла бактериясы табылган. Аталган бактерия азык-түлүктөрдөн эмес, даярдалган тамактан табылган. Жыйынтыгында, чийки азык-түлүктөрдү сактоодо жана тамакты даярдоо техникасынан кемчилик кеткен", - деп жазылат маалыматта.

Кошумчалай кетсек, мамлекеттик санитардык-эпидемиологиялык борбору учурда тамакка уулангандардын себебин аныктоону улантууда. Учурда "Ала-Тоо" ресторанынын ашканасында дезинфекциялык тазалоо иштери жүргүзүлүп жатат.

Эске салсак, Бишкектеги "Ала-Тоо" ресторанында өткөн үлпөт тойдогу тамак-ашка уулангандардын саны 234кө жеткен.