Бүгүн Бишкек ЖЭБдеги кырсыкка байланыштуу түзүлгөн депутаттык комиссия ишин жыйынтыктайт

Бүгүн, 11-апрелде Бишкек ЖЭБдеги кырсыкка байланыштуу түзүлгөн депутаттык комиссия ишин жыйынтыктайт. Бул тууралуу Жогорку Кеңештин басма сөз кызматынан билдиришти.

Маалыматка ылайык, Бишкек ЖЭБине жумшалган 386 миллион доллар жана кышта болгон кырсыктын себептерин изилдеген комиссиянын жыйыны түштөн кийин Жогорку Кеңештин имаратында өтөт. Ага мурдагы премьер-министр Жантөрө Сатыбалдиев да катыша турганы күтүлүүдө. Депутаттык комиссиянын мөөнөтү 1-апрелде аяктаган.

Эске салсак, 26-январда Бишкек ЖЭБинде авария болуп, шаардагы үйлөргө берилген жылуулук 7 күнгө төмөндөгөн. 386 миллион долларлык ЖЭБдин курулушу, ЖЭБдеги авария, өкмөттүн күз-кыш мезгилине даярдыгын иликтеп чыгуу боюнча парламентте депутаттык комиссия түзүлгөн.

Депутаттык комиссиянын курамына төмөнкүлөр кирет:

"Өнүгүү-Прогресс" фракциясынан - Исхак Масалиев;

КСДП фракциясынан - Төрөбай Зулпукаров, Данияр Аттокуров, Аида Касымалиева, Улан Примов, Аалы Карашев;

"Бир Бол" фракциясынан - Мыктыбек Абдылдаев;

"Ата Мекен" фракциясынан - Сайдулла Нышанов;

"Республика-Ата Журт" фракциясынан - Айбек Алтынбеков, Акылбек Жамангулов, Умбеталы Кыдыралиев;

"Кыргызстан" фракциясынан - Исланбек Сарсейитов, Алмазбек Токторов.