Парламент президенттин башкы прокурорду кызматтан бошотуу сунушун колдоду

Бүгүн, 11-апрелде Жогорку Кеңеш президент Сооронбай Жээнбековдун башкы прокурор Индира Жолдубаеваны кызматтан бошотуу сунушун колдоду.

Башкы прокурор Индира Жолдубаева өзү жыйынга катышкан жок. Анын катышуусу жок жыйындын өтүшү боюнча арызы келгенин төрага Дастанбек Жумабеков билдирди.

Президенттин сунушун президенттик аппараттын жетекчиси Мухаммедкалый Абылгазиев окуду.

Депутаттардын ичинен Жолдубаеванын кызматтан кетишине "макул" деп 105 депутат, "каршы" деп 2 депутат добуш берди.

Айта кетсек, президент Сооронбай Жээнбеков башкы прокурор Индира Жолдубаеваны кызматтан бошотуу тууралуу сунушун парламенттин аталган комитетине жөнөткөн.

6-апрелде Башкы прокуратуранын бир жылдык отчётун "Ата Мекен", "Республика-Ата Журт" фракциялары "канааттандырарлык эмес" деп табышкан.

Маалымат үчүн: Индира Жолдубаева башкы прокурор болуп 2015-жылдын 29-январында дайындалган. Ага чейин 2010-2015-жылдар аралыгында президенттик аппараттын укуктук камсыздоо, соттук реформа жана мыйзамдуулук боюнча бөлүмдөрүндө иштеген.

Индира Жолдубаева 1979-жылдын 11-апрель күнү төрөлгөн. Бүгүн анын туулган күнү.