Полиция издөөдө жүргөн адамды анын сүйүктүүсүнүн Инстаграмдагы сүрөттөрү аркылуу тапкан

Полиция издөөдө жүргөн адамды анын сүйүктүүсүнүн Инстаграмдагы сүрөттөрү аркылуу тапкан. Бул тууралуу чет элдик басылмалар жазып чыгышты.

Маалым болгондой, Уэльстеги Марк Прайс аттуу баңгизатын сатуу менен алектенген адам көптөн бери полиция кызматкерлери тарабынан издөөдө жүргөн. Аны полиция тарабынан кармалуусуна кылмышкердин сүйүктүүсүнүн Инстаграмдагы баракчасына жүктөгөн сүрөттөрү жардам берген.

22 жаштагы Эмили Лок соода борборлорунун биринде кассир болуп эмгектенет. Ал айлыгы аз болгонуна карабай, социалдык тармактагы баракчасына көпчүлүктү суктандырган жашоосун чагылдырган сүрөттөрдү жүктөп келген: кымбат баалуу автоунаалар, мыкты дизайнерлик кийимдер, көптөгөн өлкөлөргө болгон саякаттар... Жөнөкөй кызматкердин айлыгы ушунун баарына жетеби? Бул суроо бир гана коомчулукту эмес, полиция кызматкерлерин да кызыктырган. Жыйынтыгында, анын сүйүктүүсү тыюу салынган баңгизатын сатуу менен алектене турганы аныкталган.

Полиция кызматкерлери Марк Прайстын үйүн таап, тинтүү иштерин жүргүзгөн. Натыйжада ири суммадагы акча, кымбат баалуу буюмдар жана баңгизаттарын табышкан. Ал эми телефонунда баңгизатын сатуу менен алектене турганын далилдеген бир топ адамдар менен болгон жазышуулары бар экени аныкталган.

Балким Прайстын сүйүктүүсү көптү суктандырган жашоосун коомчулукка жарыялабаса, аны табуу оңойго турмак эмес. Ошентсе да, сурак учурунда кыз жигитинин чынында эмне менен алектенерин билбей турганын, куруучу болуп иштейт деп ойлоп жүргөнүн айткан. Бирок анын бул актануусу ага эч кандай жардам берген эмес. Сот Эмили Локту 15 айга, ал эми жигити Марк Прайсты 7 жылга эркинен ажыраткан.