Куудул Назира Жетигенованы сахнадан "Чыпалак баатырга" күйөөгө узатышты

Бүгүн, 24-апрелде куудул жана актриса Назира Жетигенова сахнада 20 жыл аталышындагы юбилейлик концертин берди.

Ага утурлай бүгүн куудул айымдын туулган күнү. Кош майрамды бирге белгилеп, Токтогул Сатылганов атындагы улуттук филармонияга калың элди чогулткан Жетигенова концертке декабрь айынан бери даярданган.

"Концерт мен ойлогондой башталды. Биринчи бөлүктө атайын мага көп берилген суроого жооп иретинде күйөөгө тийүү тууралуу сатиралык номер даярдаганбыз. Экинчи бөлүктө да жалаң жаңы тамашалар орун алды. Бул концертке өткөн жылдын декабрь айынан тартып даярдана баштагам", - деди ал.

Туулган күнүндө досторунан белек албаганын айтып таарынган куудулга жакындары белектерин күтүүсүздөн сахнага алып чыгып тартуулашты. Андан кийин Назира Жетигенованы күйөөгө узатуу демилгеси көтөрүлүп, күйөө балага "Чыпалак баатыр" аттуу каймана аты менен таанымал Зарылбек Аликенов сунушталды. Өзгөчө номер көрүүчүлөргө жылмаюу тартуулап, зал күлкүгө жаңырды.

Куудулду туулган күнү жана юбилейлик концерти менен куттуктап бир тууганы Алина Жетигенова, ырчы Дайыр Исмадияров жана кесиптеши Гүлжайна Атаканова келди. Андан соң Жетигенова менен төкмө акын Талас облусун мактаган рэп айтып, элди шаңга бөлөдү.

Концерттин видеосюжетин эртең, 25-апрелде "SUPER TV" бөлүмүнөн көрө аласыз.