Амстердамда сагыздан тигилген кроссовкалар чыкты

Нидерландынын борбору Амстердамда кайра иштетилген сагыздан кроссовкалар чыгарылды. Бул тууралуу батыш маалымат булактары жазып чыгышты.

Маалым болгондой, "Gumdrop", "Explicit Wear" компаниясы жана "Iamsterdam" шаардык уюму менен биргеликте спорттук бут кийим делген кроссовкаларды чыгарышкан. Аталган бут кийимдин таманы сагыздан жасалган. Ал эми кроссовкалардын үстүңкү бөлүгү булгаарыдан тигилген.

Кроссовкаларды даярдоо үчүн колдонулган сагыз шаар көчөлөрүнөн чогултулуп, кайрадан иштетилип чыккан. Өндүрүүчүлөрдүн айтымында, 4 жуп кроссовка үчүн 1 килограммдай сагыз керектелген.

Өзгөчө кроссовкалар 2018-жылдын июнь айында сатыкка чыгат. Болжолдуу баасы 190 еврону (15815 сом) түзөт. Ошондой эле кроссовкалар күлгүн жана кара-кызыл түстө чыгары айтылат маалыматта.

Амстердамдын көчөлөрүнө жылына 1 жарым миллион тонна сагыз ыргытылат. Мындан улам шаардык администрация жердеги сагыздарды чогултуу үчүн миллион долларын жоготот.