Казакстанда 7 жыл кулчулукта жүргөн аял: "Кулчулукта иштеп жүрүп балам өнөкөт бөйрөк оорусуна кабылды"

7 жыл Казакстанда кулчулукта жүрүп мекенине кайткан Бактыгүл Кошонова учурда элдин жардамына муктаж. Анын 10 жаштагы уулу өнөкөт бөйрөк оорусу менен алышып жүргөнүн SUPER.KG порталына айтып берди.

"Өзүм 5-класска чейин эле окугам. Кичинемде колумду ток уруп, дарыгерлер сөөмөйүмдү кесип салышкан. Ошондон кийин калем кармай албай кыйналып, мектептеги окуумду таштап салгам. 2008-жылы Казакстанга 8 айлык баламды көтөрүп алып иштегени кетип, кулчулукка кабылдым. Тоо-ташта мал карап, жылкы айдап, жумуртка чогултуп, май-сүт жасап иштедим. Шарты катаал эле. Мен иштеген Хан-Теңири деген тоодо жайы-кышы кар кетчү эмес. Балам Азиз ысык-суукта, тоо-ташта жүрүп, суук өткөрүп алган окшойт. Өткөн жылы катуу ооруп, ооруканага кайрылдык. Дарыгерлер "балаңдын бөйрөк оорусу 3-4 жашында эле башталган, өнөкөт ооруга айланып кетиптир" дешти. Кыргыз жерине келгенде эле балам экөөбүз алмак-салмак ооруп баштадык. Кудай деле бизди эптеп эли-журтуна жетип алсын деп оорутпай жүргөн окшойт", - дейт ал.

Бактыгүл айым мекенине кайтып келгенден кийин туугандары менен таарынышып кеткен. Ага өзү тууралуу ушактар себеп болгонун айтат.

"Баласын сатып жибериптир", "Казакстанга өзү эле качып кетиптир" деп айтышыптыр. Айтор, ушактардын айынан катуу оорудум. Ошол убакта балам шишип жүргөн, өзүм этек-башымды жыя албай жүрүп, балама жетиштүү көңүл бурбай калыптырмын. Кыргыз өлкөсүнө келсем деле Казакстанда жүргөндөй кыйнала бердим. Балам экөөбүз жүк болбосун деп эч нерсе албай, кийип турган кийимибиз менен эле келе бергенбиз. Бул жакка келгенде аябай кыйналдык. Кайда барба документ сурайт. Шаарда каттооң жок болсо да жаман экен. Балам шишип ооруганынан поликлиникага алып барсам "силердин шаарда каттооңор жок, биз карабайбыз" дешет".

Ал эми Азиздин оорусу былтыр медреседе окуп жүргөндө күч алган.

"Былтыр баламды бир айга медресеге жибергем. Ал жакта үйдөгүлөр менен байланыштырбайт экен. Балам шишип кетсе устаздары аллергия экен деп жүрө беришиптир. Бир күнү кабар алганы барсам көздөрү көрүнбөй калгыча шишип, көкүрөктөрү борсоюп толуп калыптыр. Жолдо келе жатсак сары суу кусту. Ооруканага алып бардым. Дарыгерлер суу толуп шишип кетиптир дешти. Бир аз кечиксем баламды жоготуп алмак экем. Ошондон кийин 3 ай ооруканада жаттык", - деп кошумчалады.

Учурда Бактыгүл Кошонова акчасына ченеп дары-дармек алууда. Ал эми дарыгерлер ар апта сайын ооруканага келип туруусун айткан. Бирок шарты жок болгондуктан ооруканага бара албай жатканын айтат.

"Дарыгерлер арзан дарыларды алсаңар тез-тезден ооруканага жата бересиңер дейт. Жакшылап караса балам айыгып кетет экен. Учурда мектепке барбай жатат. Дарыгерлер "төшөктө жатсын, мүнөздөп тамак беригиле" дешти. Өзүбүз 1 бөлмөлүү жер тамга айына 5 миң сом төлөп жашайбыз. Батир акысын көптөн бери бере элекмин, үйдүн ээси деле абалымды түшүнүп сурабай жатат окшойт", - дейт.

Азиз такай кароого муктаж болгондуктан Бактыгүл айым жумушун таштап койгон. Бирок нан-чай үчүн дагы каражат керек болгондуктан тигүү цехинен кийимдерди алып келип топчу кадайт. Азизди толук дарылатууга, тамак-ашыбызга каражат жок.

"Балам дени соодой көрүнгөнү менен аябай алсыз. Тапшырма берсем жазып жатканда колдору, буттары титиреп жаза албай койду. Мен өзүм сабатсыздыктын чуңкуруна түшүп көп кыйналдым. Балам билимдүү болсун деп, ооруганына карабай окутам деп жүрөм. Мага азыр үй, байлыктын кереги жок. Мен баламдын ден соолугуна, билимине өзүмдү толук арнайм деп чечтим. Уулумдун толук айыгып кетүүсү үчүн кайрымдуу адамдардан жардам сурайт элем. Балам чоңойсо сөзсүз сиздердин керегиңиздерге жараган уул болот!"

Жардам берүүнү каалагандар үчүн Бактыгүл Кошонованын Элсом номери: 0771 19 07 28