Кыргыз-өзбек чек арасында болгон окуя тууралуу Өзбекстан маалымат берди

Өзбекстандын чек араны коргоо кызматы Кыргызстан менен Өзбекстандын чек арасында болгон окуя тууралуу өздөрүнүн маалыматын айтып чыгышты. Жергиликтүү маалымат каражаттарында жазылгандай, 19-июнда саат 23:50дө Фергана районунун Гүлпиян айылында “Охунхожи” мүрзөсүнүн жанында өзбек чек арачылары чек араны бузган 3 унааны көрүшкөн. Алар унааны токтотууга аракет кылып, абага ок чыгарышканына карабай чек араны бузгандар унаасын айдап кете беришкен. Аларды токтотуунун аракетин көрүп, чек арачылар унааларды атышкан. Жыйынтыгында Фольксваген үлгүсүндөгү унаа токтогон. Калган 2 унаа Кыргызстан тарапка бет алып, из жашырып кетишкен. Ошол эле убакта Кыргызстандын чек арасынан 30га чукул киши чогулуп, Өзбекстандын чек арачыларын таш менен ургулашып, өзбек чек арачысы оор жаракат алган. Ал эми Фольксваген унаасынын айдоочусу самын, айна жүктөлгөн унаасын калтырып, Кыргызстанга качып кеткен. Маалыматка ылайык, алган жаракаттарынан улам ал жаран Кыргызстандын аймагында каза болгон.