Менин жерим: Бул дүйнөгө келбепсиз, Маргун айылынын килемдерин көрбөпсүз!

SUPER.KG порталы сиздин айылыңыз тууралуу кызыктуу баяндаманы чагылдырууга даяр. Сиз жашаган айылда же шаарда кооз жаратылыш, тарыхый баалуу жай, өнөрлүү адамдар барбы? Балким, эл уга элек, көрө элек көп кызыктар сиздин айылыңызда бар чыгар. Аны бардык окурмандарга бөлүшүүнү, жумурай журтка жарыялоону сунуш кылабыз.

"Менин жерим" рубрикасынын алгачкысы Баткен облусундагы Лейлек районунун Маргун айылы жөнүндө болот. Аталган айыл килемдин мекени катары даңкталат.

Айылындагы бул уз-чеберчилик тууралуу жергиликтүү тургун Роза Базарбаева айтып берди.

- Биздин айыл Баткен шаарынан 245 чакырым алыстыкта Лейлек районунда жайгашкан. Айылда 700дөй кожолук, 2 миң 500дөн ашык тургун жашайт. Менин айылымда көпчүлүк килем согуу менен тиричилик өткөрүшөт. Ошондуктан Маргун айылын килемдин мекени деп аташат. Килем согуу - айылыбызда муундан муунга өтүп келе жаткан өнөр. Айылдагы кыздар 12-13 жашынан тартып чоң энелерден килем согууну үйрөнүп өсөт. Башка жактан келген келиндер да бул өнөрдү өздөштүрүп алышат.

- Биздин килемдердин баалуулугу эч качан сапатын жоготпогонунда. Айрым үй-бүлөлөрдө 100 жылдан бери сакталып келе жаткан килемдер бар. Жадакалса, алардын өңү да өзгөргөн эмес. Мына, бул килемге 45 жыл болду.

- 2005-жылдан бери Бишкекте жана Чолпон-Ата шаарында "Оймо" фестивалы өткөрүлүп турат. Маргунда токулган килемдер фестивалдын көркүн ачып, аны Америкага, Орусияга, Японияга алып кетишет. Мындан тышкары 2006-жылдан бери жыл сайын Бишкек шаарындагы Тарых музейинде "Лейлек килеми" көргөзмөсү өткөрүлүүдө. Айылдаштарыбыз ага да катышып турушат.

- Килем согууга койдун жүнү колдонулуп, ал тазаланып, жыты кеткиче жуулат. 1 килем 1 жумада, кээде 15 күндө даяр болуп, сатыкка чыгат. Ага түстү да өзүбүз берип, оюуларын түшүрөбүз. Мунун баары килем согуучунун тажрыйбасынан, фантазиясынан көз каранды.

Килемдер 25 миң сомдон 40 миң сомго чейин, кээде андан да жогору баага көлөмүнө жараша сатылат. Килемдерден тышкары унааларга салына турган чакан килемчелерди, кыздарга сеп жасагандар да бар.

Айыл тууралуу айта турган болсом, 1 мектеп, 1 бала бакча, маданият үйү, токой чарбасы бар. Айылыбыз тынч, жашоочулар ынтымактуу.

Урматтуу окурман, сиз да айылыңыз тууралуу сыймыктанып айтып бергиңиз келеби? Анда SUPER.KG порталына, +996 557 473 939 номерине WhatsApp аркылуу маалымат, сүрөт, видео жөнөтүңүз.

Ар бир айыл атак-даңкка татыктуу!