Канн кинофестивалында Кыргыз кызы тууралуу тартылган тасма ат салышат

71-ирет өткөрүлүп жаткан Канн кинофестивалына орусиялык режиссёр Сергей Дворцевойдун Кыргыз кызы тууралуу тарткан тасмасы "Алтын бутак" сыйлыгы үчүн ат салышат. Мындай маалыматты чет элдик басылмалар жазып чыкты.

Маалым болгондой, быйыл өткөрүлүп жаткан эл аралык кинофестивалга "Айка" тасмасы катышып, негизги баскычтан өткөн. Эми аталган тасма белгилүү режиссёрлор тарткан фильмдер менен башкы сыйлык үчүн ат салышат.

"Айка" тасмасы - Москва шаарында мыйзамсыз иштеп жүргөн Кыргыз кызынын окуясын чагылдырган драма. Анда Айка күтүүсүз жерден кош бойлуу болуп, баласын жарыкка алып келет. Жардам берип, каралаша турган адамы болбогондуктан, жаңы төрөлгөн ымыркайын төрөт үйүнө таштап кетет. Бирок энелик сезими ага жай бербегендиктен таштап кеткен баласын издейт.

Тасмада башкы ролду казак актрисасы Самал Еслямова жараткан. Тасманы жаратууга Орусия, Казакстан, Польша, Германия жана Кытай мамлекеттери да катышкан. Драманы тартуу үчүн 6 жыл убакыт сарпталган.

"Айка" драмасы 18-майда көрсөтүлөт.