ТЕСТ: Аялзатынын бири сүйдүрөт, бири азабыбызды тартат. Мен экинчисин билем, ал апам... Атактуулардын апасы тууралуу маалыматыңыз барбы?

"Биз апамдан канча эсе көп акча табабыз, бирок бат эле жок болуп кетет, жетпей калат. Өзүбүздүкүн коротуп салып апамдан сурайбыз. Анткени анда дайыма акча бар, кантип баарына жеткирет түшүнбөйсүң, береке деген ушу да. Апам биз үчүн берекенин символу, - деген "Супер-Инфого" берген маегинде ырчы Жамиля Муратова.

"Апамдын буюмдарын карап, кээде катуу сагынганымды байкайм. Өз колунан чыккан жакшы буюмдары бар. Менде болсо апамдын казаны эстеликке калган", - дегени бар Кубик Калыковдун.

Эстрада ырчысы Кенже Дүйшеева жаз мезгилинде атасын, 15 күндөн кийин апасын жоготкон. Анын "Алма гүлү ачкан кезде, ата, сизден айрылдым, алма гүлү төккөн кезде, апа, сизден айрылдым" деп ата-энесине арнаган ыр саптары бар.

ЖКнын депутаты Жанар Акаев "Супер-Инфо" гезитине берген маегинде: "Апам өмүрү учакта учпаптыр. Бир ирет Бишкектен Ошко чогуу учуп калсак, "жүктү багажга бербейм, буларың жоготот" деп чыкса болобу. "Ой, апа, муну Оштон алабыз" десем, "жок, жаныма кармап алам, неберелериме таттууларым бар, самолётто адашат" деп көнбөйт. Ошентип ишенбей жатып араң көндүргөм", - деген.

Ырчы Роза Шакированын: "Үйдүн жанына эки кабат времянка салдык. Усталар келип пайдубал куюп, жыгач кагып бергени эле болбосо, апам ылайдан дубал тургузган", - деп айтканы бар.

Мурдагы маданият, маалымат жана туризм министри Алтынбек Максүтов артист болуп апасынын кыялын орундатканын айткан. "Апам жакшы ырдачу, бирок туугандары артист болбойсуң дептир. Турмушка чыккандан кийин "мен жетпеген кыялыма балам жетсин, элдин адамы болсун" деп тилек кылып ырчы Алтынбек Сапаралиевдин атынан Алтынбек деп атымды коюптур. Апамдын кыялын ишке ашырганыма кубанам", - деген ал.

"Апамды көп көрбөй калсам аябай сагынып кетем. Армиядан да аны сагынып кат жаза берчүмүн. Баарынан кызыгы апам мени эр жетип чоңойгончо өзү киринтип жүрдү. Анткени мен мончого барганды аябай жаман көрчү элем. Апам чоң дагарага салып алып мени аябай жышып жуунтар эле", - деген Курмангазы Азыкбаев.

"Азия Микс" командасынын капитаны Эльдияр Кененсаровдун апасы ушул жылы президенттин колунан сыйлык алган. "Апам эми менин эмгегимди түшүнүп жатат. Бир кезде "эмнеге мындай иш менен жүрөсүң, эмне клоунсуңбу? Бар, жакшы жумуш тап" деп айтчу. Эми болсо президент менен түшкөн сүрөтү, сыйлык үйүнүн төрүндө турат. Демек, бул окуя жашоосундагы эң урунттуу окуя болду", - деген ал.

Бул сөз шоу бизнестин жаш ырчысы Айдана Декага таандык. Ал "Супер-Инфого" берген маегинде апасы тууралуу: "Апам толук айымдарды арыктатат", - деп айткан.

"Мени атамдын көзү өтүп кеткен агасынын байбичеси багып алган. Мен чоңойгон үй менен өз ата-энемдин үйүн бир эле кошунабыз бөлүп турчу. Менин тозок жашоом өз ата-энеме кайрылып келгенде башталды. Бир туугандарымды бир тууган дей албайм, алар дагы мени чоочундай кабыл алышты. Уруша кеткенде "өзүңдүн балдарың биринчи тийишти, өзүңдүн балдарыңды кой дебейсиңби" деп айтам. Эрке өскөн бала элем, ошентип жетиге чыкканда катуу сындым", - деген куудул Борончу Кудайбергенов.

"Мектепте окуп жүргөндө чачты суулап туруп улууларды туурап артка силкчүбүз. Силксем эле апам "эй, моюнуң үзүлөт, силккенди сага ким коюптур" деп урушуп жатып калчу", - деп Малик Аликеев апасынын берген тарбиясын эстеген.

"Студент кезде апам "балам шаарда тууганы жок, жалгыз кантип жүрөт болду экен?" деп ыйлай берчү экен. Атам болсо "кантип жүрмөк эле, элдин балдарындай эле жүрөт, керек болсо бекетте түнөйт, эркек бала бардыгын көрүш керек" деп койчу экен. Бирок телефондон ыйлаганын мага эч билдирчү эмес", - деген саясатчы Улукбек Кочкоров.

"Энем 83 жашында тамакты жакшы ичпей калды. Кийин ашказанына операция жасап, түтүк менен тамак бере баштадык. Түнкү сменде элем, аялым «тез кел, энем кыйналып жатат» деди. Атамды да чакырттык, ал келгенден кийин эле үзүлдү. Ошондо өзүмө, врач кесибиме таарындым. Эчен өмүрлөрдү сактап, мага өмүр берген энемди сактай албай мөгдөп калдым", - деп Мамбет Мамакеев энеси тууралуу эскерген.

"Кичинемде көбүрөөк эжемдин колунда өстүм. Атам менен апам эртеден кечке жумушта, кийинчерээк докторлугун жактап жүрүштү. Алардын "тигини кыл, муну жасаба" деп айткандары деле эсимде жок. Ата-энем өздөрүнүн жашоо-турмушу, жүрүм-туруму менен эле балдарына үлгү болуп, тарбия беришкен экен. Мен ата-энем бир да жолу жазалабаган баламын", - деп Жоомарт Оторбаев "Супер-Инфо" гезитине берген маегинде айткан.