Жанар Акаев: "Мурда оппозиционерлердин тагдырын бир ууч саясий-бандиттик топ чечкен учурлар көп болгон"

Бүгүн, 21-майда Жогорку Кеңештин бир нече депутаты Өмүрбек Текебаевдин иши боюнча жаңы жагдайлардын ачылганын билдирип, сот ишти кайра карап чыгуусу керектигин айтышты. Ушул маселенин негизинде SUPER.KG порталынын узаткан соболуна Жогорку Кеңештин депутаты Жанар Акаевдин жообу төмөнкүдөй.

Жогорку Кеңештин депутаты Жанар Акаев учурдагы бийликтен жарандар адилеттүүлүктү күтүп жатканын айтты. "Өлкөдө саясий режим алмашты. Миңдеген адамдар соттордон, жаңы бийликтен адилеттүүлүктү күтүп жатат. Мурда өлкөдө адамдардын, коомдук ишмерлердин, саясатчылардын, оппозициялык ишмерлердин тагдырын бир ууч саясий-бандиттик топ чечкен учурлар көп болгон. Ак Үйдөгү Манас Арабаев деген адам соттор үчүн Кудайдан кийинки адам эле. Азыр ал кызматтан кетти. Эми коомчулукта үмүт пайда болду.

Өмүрбек Текебаевдин иши ушундан башталса, башка саясий туткундарга да акырындык менен кадам ташталат деп ойлойм. Өмүрбек Текебаев, Дүйшөнкул Чотонов эле эмес, Канат Исаевдин, Садыр Жапаровдун да саясий негизде соттолгонун мурдатан бери айтып келе жатабыз. Текебаевдин иши жаңы жагдайларга байланыштуу кайрадан каралышы керек. Биз муну талап кылабыз", - деди Акаев.

Саясат таануучу Марс Сариев, Жогорку Кеңештин депутаттары Айнуру Алтыбаева, Сайдулла Нышанов, Марлен Маматалиевдин пикирлери төмөнкү шилтемеде.