Ысык-Көлдө кызга жолугууга келген 17 жаштагы балага бычак сайылды

Ысык-Көл облусунун Жети-Өгүз районунда 17 жаштагы бала бычактан жаракат алып ооруканага жеткирилди. Бул тууралуу Ысык-Көл ОИИБинин басма сөз кызматы билдирди.

Маалыматка ылайык, окуя 27-майдан 28ине караган түнү болжол менен саат 23:30дар чамасында болгон.

"28-майда Жети-Өгүз РИИБине Оргочор айылынын 17 жаштагы жашоочусу бычактан алган жаракатынын улам Ысык-Көл аймактык ооруканасына жеткирилгени боюнча маалымат келген. Анда Бишкек шаарында туулган Оргочор айылына 27-майда келген 17 жаштагы бала айылдашы менен Светлая Поляна айылындагы сүйлөшкөн кызына жолугууга барган. Кыз менен жолугуп турганын көргөн кыздын тууганы ачууланып, достору менен балдарды сабаган. Мушташтан улам кызга келген бала бөйрөк тушка бычак жеп, ооруканага жеткирилген. Жаракат алган балага Ысык-Көл облустук ооруканасында операция жасалган. Учурда бул иш териштирүүгө алынып, соттук-медициналык экспертиза дайындалды", - деди маалымат катчы.