Оштун борбордук базарында өрт чыкты

Ош шаарынын борбордук базарындагы соода контейнерлеринин биринен өрт чыкты. Бул тууралуу Ош ОИИБинин басма сөз кызматы билдирди.

Маалыматка ылайык, өрт бүгүн, 29-майда эртең менен саат 08:00 чамасында чыккан.

"Оштун борбордук базарындагы соода контейнерлеринин биринен өрт чыгып, мындан улам жанындагы 3 контейнерге жалыны өтүп кеткен. Таң эрте жумушка келген сатуучулар түтөп жатканын көрүшкөн. Алардын көбү ачыла элек болгондуктан, соодагерлер түтөп жаткан контейнерди өчүрө алышкан эмес. Арадан 5-10 мүнөт өткөн соң түтөгөн контейнерлер өрттөнүп, жалын кулпуланып турган дагы 3 контейнерге өткөн", - деди маалымат катчы.

Тергөөнүн жана ӨКМнын ыкчам тобунун алгачкы аныктамасы боюнча, өрт туура эмес орнотулган электр зымдарынан чыккан.