"3,3 гектар жер боюнча макулдашууну артык кылабыз деп тыртык кылып алдык" дейт шаардык кеңештин депутаты Мүзүралиев

"Шашылыш түрдө кароого коюлган 3,3 гектар жер боюнча маселени төрага артык кылам деп тыртык кылып алды", - деген пикирин бүгүн, 31-майда шаардык кеңештин депутаты Канатбек Мүзүралиев айтты.

"Кечээ "Кыргыздипсервистин" кызматкери депутаттарга туура эмес билдирүү таратып алды - бул бир. Экинчиден, төраганын бул маселени шашылыш кабыл алганы болду. Анын эртерээк чечим кабыл алуу керек деп койгон маселеси колдоо таппай, башкача айтканда, артык кылам деп тыртык кылып алдык. Мындан улам бүгүн министр Эрлан Абдылдаев жана "Кыргыздипсервистин" директору келип кетти", - деди Мүзүралиев.

"Кытай мамлекети бизге 49 жылга Пекин шаарынын борбордук бөлүгүнөн 25 сотых жер бергени жатат. Муну менен биринчиден, ижара акысын төлөө маселеси токтотулат. Андан тышкары Кытай тарап бизге өздөрүнүн акчасы менен элчиликтин эки-үч кабаттуу имаратын салып беришет. Анын жанына кошо эле 5 кабаттуу мейманкана салынганы турат. Бул мейманкана бизден барган ар кандай делегациялар жата турганга жана элчиликте иштеп жаткан кызматкерлер үчүн акысыз жашаганга ылайыкташат.

Ошонун негизинде биз бүгүн кайра мыйзамды сактап, күн тартибинде кайра карадык. Негизи 3,3 гектар жер менен 25 сотых жерди салыштыруу болбойт. Биз тараптан деле гектар жер суроо болгон жок. Бирок алардан гектар жер алганда алардын борбордук бөлүгүнөн андай көлөмдөгү жер чыкпайт. Андай жер шаардын четинен табылышы мүмкүн. Анан дагы биздеги жер тилкелердин баасы менен алардагы жер тилкелердин баасын салыштыруу мүмкүн эмес болгондугунда", - деди шаардык кеңештин депутаты.

Эске салсак, бул келишим 30-майда Бишкек шаардык кеңешинде каралып, депутаттар аны колдогон эмес эле. Бирок кароо кайрадан бүгүн, 31-майда уланып, жыйынга катышкан 25 депутат тең долбоорду кабыл алууга "макул" деп добуш берди.