"Күйөөм балдарымды дубалга сүздүрдү. Чыдабай коомчулукка айтайын деп чечтим" дейт өгөй атасы тарабынан аёосуз сабалган балдардын апасы

2 жана 5 жаштагы балдар өгөй атасы тарабынан аёосуз сабалган. Бул тууралуу сабалган балдардын апасы Айсулуу бүгүн, 5-июнда SUPER.KG порталына окуянын чоо-жайын айтып берди.

"Күйөөм мага 1 жарым жылдан бери эле кордук көрсөтүп келе жатат. Акыркы 3 күндөн бери ичкилик ичип, мага эле эмес, балдарыма дагы кол көтөрө баштады. Аларга болушсам, мени эсим оогончо сабап салды. Балдарымды да телефондун кубаттагычы менен сабап, 2 жаштагы баламды дубалга сүздүрдү. Күйөөм көбүнчө колуна самын байлап алып менин башыма урат. Анысы аз келгенсип, "мен милициянын баласымын, кимге арыздансаң дагы мени эч нерсе кыла албайсың. Эки рэкет иним бар, алар силерди өлтүрүп кетет" деп коркутат. Күйөөмдү таштап, балдарым менен кетип калайын десем, ата-энем же бир туугандарым жок. Айласыздан жашап келгем. Күйөөм айдоочу болуп иштейт. Кордук көргөнүмдү эч кимге айтчу эмесмин. Эки баламды сабаганда айласыз коомчулукка айтууга туура келди", - дейт сабалган балдардын апасы Айсулуу.

Белгилей кетсек, 4-июнда саат 21:00 чамасында Сокулук райондук ооруканасына 2 жана 5 жаштагы эки бала денесиндеги ар кандай жаракаттары менен түшкөнү кабарланган.
Учурда аялын жана балдарын сабаган делген 36 жаштагы адамга карата кылмыш иши козголуп, ал Сокулук РИИБинин убактылуу кармоочу жайына камакка алынган.