Сапар Исаковдун жактоочусу да шаардык сотко даттанды

Мурунку премьер-министр Сапар Исаковдун баш коргоо чарасы боюнча Биринчи Май райондук сотунун чечимине айыпталуучунун тарапташтары нааразы. Бүгүн, 7-июнда Исаковдун жактоочусу Учкун Каримов райондук соттун чечимине нааразы болуп, шаардык сотко арыз жазды.

Белгилей кетсек, 5-июнда райондук сот Сапар Исаковду тергөө аяктаганга чейин 2 айга УКМКнын тергөө абагында калтыруу чечимин кабыл алган. Мыйзамга ылайык, чечим чыккандан кийин 5 күн аралыгында жогорку инстанцияга кайрылса болот.

Эске салсак, Исаковго 29-май күнү "коррупция" беренеси менен айып тагылган. Учурда тергөө иштери уланууда.

Айта кетсек, 5-июнда Сапар Исаков УКМКга бешинчи ирет суракка чакырылып, ошол күнү соттун чечими менен тергөө абагына камакка алынган.

Буга чейин 26-апрелде Сапар Исаков Бишкек ЖЭБ боюнча козголгон кылмыш ишинин негизинде күбө катары УКМКда сурак берген. "Бишкек ЖЭБи боюнча менин күнөөм бар деген сөздөр чындыкка дал келбейт", - деп билдирген. 14-майда Сапар Исаков экинчи жолу суракка барган. Анда УКМКга кирип баратып "саясий куугунтук болуп жатат" деп айткан.

Белгилей кетсек, 26-январда Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Мындан улам бир жыл мурун Кытайдан алынган 386 миллион доллар менен жаңыланган ЖЭБге карата сын-пикирлер күчөгөн. Бул факты боюнча кылмыш иштери козголуп, тергөөнүн жүрүшүндө бир топ жооптуу кызматкерлер кармалган.