Анжелика: "Туулган күнүмдөгү 5 кабаттуу тортту кайрымдуулукка берем"

12-июнда ырчы, актриса, алып баруучу жана ишкер айым Анжелика борбордогу ресторандардын биринде 29 жашын белгиледи. Кече адаттагыдан өзгөчө болду. Ырчы айым туулган күнүн бул ирет жашоосунда өзгөчө орун ээлеген айымдар менен гана өткөрдү.

Майрамдык кечеде Анжелика айым апасына гүл берип, бүгүнкү күн жарык дүйнөгө алып келген апасынын майрамы экенин айтты. Ырчынын апасы Гүлина айым: "Кызымды 7 жыл Кудайдан тилеп тапкам. Эне деген баласы үчүн бардыгын тартуулагысы келет. Мен кызыма "жүрөгүмдү" тартуулайм", - деп алтын зер буюмун тартуулады. Ал эми оригиналдуу белектердин бирин Анжеликанын эң жакын курбусу тартуулады. Тагыраагы, ак жана кызыл роза гүлдөрү менен "Анжела" деп жазылган вазадагы гүлдөрдүн топтомун берди. Анжелика айымды сыйлаган, аны менен чогуу иштешкен мырзалар да бул күнү четте карап тура албады. Тактап айтканда, кечеге дизайнер-модельер Арзубек Вонама келип, ырчыга жаңы кийимдер коллекциясынан көйнөк белекке берип кетти. Ал эми ырчы айым кеченин соңунда туулган күнүн кандай өткөргөнүн айтып берди.
"Мени биринчилерден болуп кыздарым куттукташып, белектерин беришти. Алардын белеги мен үчүн туулган күнүмдөгү эң жагымдуу белек болду. Туулган күнүм Кадыр түнгө туш келип калганына да сүйүнүп турам. Өздүк майрамымды түнү менен жакындарымдын курчоосунда тостум. Периштелер түшкөн күндө менин дарегиме жакшы каалоо-тилектер айтылды. Туулган күнүм 3 жылдан бери Орозо айына туш келип жатат. Ошондуктан жакындарымды ооз ачар маалга чакырдым. Өзүм дагы орозо кармагам. Коноктор менен бирге ооз ачып жатам. Бүгүн белектердин эң өзгөчөсү кондитердик компания белек кылган 300 адамга жете турган 5 кабаттуу торт болду. Анын эң үстүндө таттуудан менин сөлөкөтүм жасалган. Ал эми торттун артканын кайрымдуулукка берем. Туулган күндүк кечеге чакырылган коноктордун дээрлик бардыгын айымдар түздү. Негедир бул ирет айымдардын курчоосунда гана өткөргүм келди. 29га чыгып 3 кыздын апасы болдум. Жашоомдо алдыга койгон пландарым ишке ашып келе жатат. Мен бактылуумун", - дейт Анжелика.