Сот Канат Исаев боюнча кылмыш ишин токтотту, бирок ал камакта калды

28-июнда Бишкек шаардык сотунда Токмок шаарынын экс-мэри Канат Исаевдин иши боюнча соттук отурум өттү.

Анда соттук коллегия Исаевге карата кылмыш ишинин эскирүү мөөнөтү бүткөнүнө байланыштуу аны токтотуп, "коррупция" беренесинен "кызматтык абалынан кыянаттык менен пайдалануу" беренесине өзгөртүү чечимин кабыл алды. Айыпталуучулар Токмоктун экс-вице-мэри Болот Имамадиев жана Муниципалдык менчик башкармалыгынын мурдагы башчысы Мирлан Эсенбеков сот залынан бошотулду, ал эми экс-мэр Канат Исаев камакта калды.

Эске салсак, Бишкек шаарынын Биринчи Май райондук соту ушул жылдын 4-январында Канат Исаевди 2008-2010-жылдар аралыгында Токмок шаарынын мэри кызматын аркалап турганда "пара алууга жол берген жана кызмат абалынан пайдаланган" деп 12 жылга эркинен ажыраткан. Ошондой эле мүлкүн конфискациялоо менен бирге жазасын өтөгөн соң 3 жылга чейин мамлекеттик кызматтарда иштөөгө тыюу салган. Анын жактоочулары соттун чечимине каршы экенин билдирип, шаардык сотко даттанышкан.