Пакистандын мурдагы өкмөт башчысы коррупция боюнча айыпталып 10 жылга кесилди

Пакистандын мурдагы премьер-министри Наваз Шариф коррупция боюнча айыпталып 10 жылга эркинен ажыратылды. Бул тууралуу чет элдик басылмалар жазып чыгышты.

Маалыматка караганда, Шариф оффшордук фирма аркылуу Лондон шаарынан 4 батир сатып алганы аныкталган. Ошондой эле мурдагы өкмөт башчы менен кошо анын кызы Марьям жана күйөө баласы Сафдар Аван да күнөөлөнүүдө. Марьям 7 жылга эркинен ажыратылса, күйөө баласы 1 жылга кесилген.

Сот Шарифти сыртынан кескен, ал учурда үй-бүлөсү менен Лондон шаарында жашайт. Ал өзүнө козголгон иште саясий өңүт бар экенин белгилеген.

Мурдагы өкмөт башчыга карай иш 2016-жылы ММКга "Панама архиви" аталышындагы маалымат чыккандан кийин козголгон.