25 күндөн бери Чаткал суусунан изделип жаткан жарандын жансыз денеси Ташкенттен табылды

25 күндөн бери Чаткал суусунан изделип жаткан жарандын жансыз денеси Өзбекстандан суудан табылды. Бул тууралуу 17-июлда SUPER.KG порталына маркумдун аталаш агасы Канат Кудайкулов кабарлады.

"Инимдин жансыз денеси Өзбекстан Республикасынын Ташкент облусуна караштуу Бостондук районунун Газалкент шаарынан табылды. Учурда сөөктү өлүк сактоочу жайдан Кыргыз жерине алып кетүүнүн аракетин көрүп жатабыз", - дейт маркумдун агасы.

Эскерте кетсек, 22-июнь күнү Каныш-Кыя айыл аймагынын Айгыр-Жал айылынын тургундары 23 жаштагы Э.Т. жана 1997-жылы туулган М.Т. Матиз үлгүсүндөгү унаасы менен үйүнөн чыгып кеткен боюнча кайтып келишкен эмес. ӨКМнын Чаткал райондук бөлүмүнүн кызматкерлери 25-июнь күнү Ак-Таш айылындагы Чаткал дарыясынын жээгинен жогорудагы жарандардын документтерин жана өздүк буюмдарын табышкан.

1-июль күнү издөө иштери жүргүзүлүп, саат 15:00дө 21 жаштагы М.Т. аттуу жарандын жансыз денеси суудан табылып, туугандарына өткөрүп берилген. Ал эми экинчи жаранды издөө иштери улантылып, бирок натыйжа чыкпай келген.

Буга чейин Канат Кудайкуловдун берген маалыматына караганда, ага-ини Сары-Челекке баруу үчүн жолго чыккан. Мындай маалыматты алардын достору билдиришкен.

"Бир туугандардын кичүүсү Сары-Челектеги сүйлөшкөн кызына бармак экен. Алар бул үчүн досторунан акча сурашыптыр. Ата-энесине болсо концертке барабыз деп үйдөн кечинде чыгып кетишкен экен. Унааны кичүүсү айдап бара жаткан окшойт. Себеби ал табылганда сынып кеткен мурунуна рулдун изи түшүп калыптыр. Анын денеси кечээ жерге берилди. Ал быйыл Ош шаарындагы медициналык окуу жайдын 4-курсун аяктаган.

Мен ошол күнү саат 21:00 чамасында алар менен телефон аркылуу сүйлөшкөндө концертте жүрөбүз деп айтышкан. Унаа болсо уулусунуку болчу. Ал окууну аяктап, жумушка киргени жаткан. Издөө иштери улантылып жатат. Баарыбыз изделип жаткан иним аман-эсен табылса деп тилек кылуудабыз", - деп билдирген ага-ининин аталаш тууганы.

Ал эми ага-ини кырсыкка кабылган унаа дале табыла элек.